रीता लामा
घोराही, २१ वैशाख । लमही नगरपालिका वडा नम्वर ५का ७४ बर्षिया लक्ष्मीनारायण खनाल लामो समय पछि पाण्डवेश्वर महादेव मन्दिर धारापानीमा आउने मौका पाए । आफु जत्तिकै उमेर पुगेकी पत्नी दुर्गादेविलाई पनि साथमा लिएर आएका खनालले वडा भरीकै जेष्ठ नागरिकसँग घुम्न पाउँदा औधी खुसि लागेको बताए ।
‘धेरै बर्ष पहिले आएको थिए, म आउदाँ यहाँ यस्तो थिएन, जंगल धेरै थियो ।’ उनले भने ‘अहिले त धेरै परिवर्तन भैसके छ, रमाइलो र हेर्न लाएक बनाएका रैछन ।’ लमही नगरपालिका वडा नम्वर ५ले शनिवार वडा भरीका जेष्ठ नागरिकलाई धार्मिक भ्रमण गराएको छ । त्यो भ्रमणमा आएका ६० बर्ष माथिका करिव ७८ जेष्ठ नागरिकले घोराही उपमहानगरपालिका वडा नम्वर ५मा रहेको पाण्डवेश्वर महादेव मन्दिर धारापानीमा धार्मिक भ्रमण गरेका छन् ।
उमेरले नेटो काटिसकेको समयमा सरकारको तर्फबाट आफुहरुलाई धार्मिक आस्थाको केन्द्रमा आउने मौका दिएको भन्दै जेष्ठ नागरिकहरु हर्सित भएका थिए । भ्रमणले विशेष गरि बृद्धबृद्धाहरु एक आपसमा परिचय, भेटघाट र घुमफिरको मौका पाएको भन्दै रमाएका थिए । धार्मिक र पर्यटकिय रुपमा महत्व बोकको पाण्डवेश्वर धामलाई नजिकबाट हेर्न पाउदा उनीहरु खुसि भएको प्रष्ट देख्न सकिन्थ्यो ।
वडा भरीका जेष्ठ नागरिकलाई धार्मिक क्षेत्रको अवलोकनको लागि ल्याएका वडा अध्यक्ष बीमबहादुर केसीले जेष्ठ नागरिकको चाहाना अनुसार नै आफुले उनीहरुलाई धार्मिक भ्रमणमा ल्याएको बताए ।
वडाले गत बर्ष जेष्ठ नागरिकहरुको लागि १ लाख २५ रुपैँया छुट्याएको र सोही बजेटलाई जेष्ठ नागरिकले धार्मिक क्षेत्रको अवलोकन गर्न जाने प्रस्ताव राखे पछि आफुले पाण्डवेश्वर महादेव मन्दिरको अवलोकन गराउन ल्याएको बताए । उनले आगामी नीति तथा कार्यक्रममा पनि जेष्ठ नागरिहरुको लागि छुट्टै बजेट विनियोजन गरिने र उक्त बजेटलाई जेष्ठ नागरिकको चाहाना अनुरुप खर्च गरिने बताए ।
साथै उनले अव आफुले वडा नम्वर ५मा जेष्ठ नागरिकहरुको लागि दिवा सेवा केन्द्र स्थापनाको प्रयास थालेको बताए । जेष्ठ नागरिकहरुलाई दिवा सेवा केन्द्रको लागि जग्गाको खोजि गरिरहेको र विशेष गरि वडाको बीच भाग मै पर्ने गरि सेवा केन्द्र बनाउने सोचमा आफु रहेको उनले बताए ।
लमही नगरपालिकाबाट घोराहीसम्म धार्मिक यात्रामा आएका जेष्ठ नागरिकहरुलाई पाण्डवेश्वर महादेव मन्दिरका व्यवस्थापन समितीका अध्यक्ष गणेश अधिकारीले मन्दिरको ऐतिहासिक र धार्मिक महत्वको बारेमा जानकारी गराएका थिए । उनले हाल मन्दिरमा भएका भौतिक संरचनाहरु, के कसरी निर्माणसम्पन्न भयो भन्ने बारेमा पनि बताएका थिए । भने वडा कार्यालयले जेष्ठ नागरिकलाई दोसल्ला र नगद सहित सम्मान गरेको थियो ।
