तुलसीपुर, ११ पुस | भ्रमण वर्ष सन् २०२० लाई लक्षित गदै तुलसीपुर उपमहानगरपालिकामा वर्ष भरी विभिन्न कार्यक्रम तथा महोत्सव सन्चालन हुने भएको छ । उपमहानगरपालिका भित्र रहेका पर्यटन क्षेत्र, धार्मिक स्थल, सांस्कृतिक सम्पदा, प्राचिन कला,धर्म तथा संकृति, मठमन्दिर, साहित्यीक, नेपाली चाडपर्व, खान महोत्सव र धर्म संग जोडिएका विभिन्न चाड पर्वलाई पनि पर्यटन वर्ष संगै जोडेर कार्यक्रम तथा महोत्सवको आयोजना गरिने भएको हो ।
नगर प्रमुख तथा तुलसीपुर उपमहानगर पर्यटन प्रर्वद्धन समितिका संयोजक घनश्याम पाण्डेले सवै विषय बस्तुलाई समेटेर पर्यटन बर्षलाई भव्य रुपमा सफल बनाउने बताउनुभयो ।
आगामी पौष १६ गते अर्थात जनवरी १ तारिखका दिन तुलसीपुर ७ मा रहेको राप्ती शान्ती उद्यान पार्कमा उद्घाटन गरिने भएको छ । उद्घाटन हुनु अघि तुलसीपुर बजार क्षेत्रमा रहेको त्रिशिद्धेश्वरी मन्दिरबाट पार्क सम्म झाँकी जुलुस सहितको बृहत ¥यालीको आयोजना गरिने भएको छ । भ्रमण वर्ष उद्घाटन गर्न पाँच नम्वर प्रदेशका सभामुख पुर्ण बहादुर घर्ति दाङ आउने भएका छन् ।
भ्रमण वर्ष २०२० को तयारी समितिका संयोजक रुप बहादुर खत्रीले आगामी जवनरी १ तारिख देखी डिसेम्वर ३० तारिख सम्म सञ्चालन गरिने वार्षिक कार्ययोजना रहेको बताउनुभयो ।
उहाँका अनुसार तुलसीपुर क्षेत्रको दक्षिण तर्फ दमारगाउँ भज्याङ लेक, पश्चिमको बागरखोला र भमकेखोला, उत्तरमा सल्यान संग जोडिएको चोरखोला र पुर्व तर्फमा हापुर खोलामा घुम्न जाउँ तुलसीपुर कार्यक्रमको सन्देश सहित प्रवेशद्धारा निर्माण गरिने भएको छ ।
