दाङको विकासमा लकडाउनको असर, सडकको ३९ प्रतिशत बजेट खर्च हुन सकेन

दाङ, ११ साउन । कोरोना भाइरस रोकथामका लागि चार महिनासम्म भएको लकडाउनका कारण दाङमा सडक निर्माणको कार्यप्रगति न्यून भएको छ । डिभिजन वन कार्यालय दाङका अनुसार आर्थिक वर्ष २०७६÷०७७ मा कुल एक अर्ब २८ करोड ३१ लाख रुपैयाँ बजेट विनियोजन भएको थियो । विनियोजित मध्ये ७९ करोड ३६ लाख १७ हजार रुपैयाँ मात्र खर्च भएको छ । कुल विनियोजित मध्ये खर्च भएको रकम ६१ प्रतिशत हुन आउँछन ।

आव २०७६÷७७ मा विनियोजित मध्ये ३९ प्रतिशत अर्थात ४८ करोड ९४ लाख ८२ हजार रुपैयाँ खर्च हुन नसकेको सडक डिभिजन कार्यालय दाङका सूचना अधिकृत खुमबहादुर भण्डारीले जानकारी दिनुभयो । ‘गतवर्ष कुल विनियोजित मध्ये ८१ प्रतिशत बजेट खर्च भएको थियो,’ उहाँले भन्नुभयो, ‘लकडाउनका कारण सबै कामकाज थप्प भए ।’

सरकारले चैत ११ गते देखि पूर्ण लकडाउन गरेको थियो । पहिलो डेढ महिनामा कुनै पनि काम हुन पाएन । डेढ महिनापछि सरकारले निर्माणजन्य काम सुचारु गर्ने घोषणा गरेपनि अपेक्षाकृतरुपमा कामको गति अघि बढ्न सकेन । लकडाउनका कारण मजदूर घरघर गइसकेकाले फर्कन निकै गाह्रो भएको भण्डारीको भनाई छ । ‘सवारीसाधन नचल्दा घरफर्केका मजदूरहरु निर्माणस्तलसम्म आउन सकेनन्, केही मजदूरहरु कोरोनाका डरले पनि काममा फर्कन मान्नुभएन,’ उहाँले भन्नुभयो, ‘यहीँ कारण समयमा सडक तथा पुलका काम सम्पन्न नहुने निश्चित भएको छ ।’

सडक डिभिजन कार्यालयमा पुजिगत तर्फ विभिन्न १० ओट शिर्षकमा बजेट विनियोजन भएको थियो । कुनै पनि शिर्षकमा पूरा खर्च हुन सकेको छैन । रणनीतिक सडक पुल निर्माण तथा पुलपुलेसा संरक्षणमा १२ करोड १५ लाख रुपैयाँ बजेट विनियोजन भएकोमा ९ करोड १३ लाख रुपैयाँ खर्च भएको छ । यो शिर्षकमा ३ करोड रुपैयाँ खर्च हुनसकेको छैन । त्यसैगरी स्थानीय सडक पुल निर्माण तर्फ ३४ करोड २२ लाख रुपैयाँ विनियोजन भएकोमा २९ करोड ९१ लाख रुपैयाँ खर्चभएको छ भने ५ करोड रुपैयाँ खर्च हुनसकेन ।

सडक क्षेत्र विकास आयोजनामा त झन् अत्यन्त न्यून कार्यप्रगति भएको छ । सो शिर्षका १० करोड रुपैयाँ विनियोजन भएकोमा ३ करोड ३८ लाख रुपैयाँ मात्र खर्च हुन सकेको छ । ६ करोड ६१ लाख रुपैयाँ खर्च हुन नसकेको कार्यायले जानकारी दिएको छ ।

औद्योगिक पूर्वाधार विकास कार्यक्रम (विशेष आर्थिक क्षेत्र समेत)मा ३ करोड रुपैयाँ विनियोजन भएकोमा ४१ लाख ३८ हजार रुपैयाँ मात्र बजेट खर्च भएको छ । २ करोड ५८ लाख ६१ हजार रुपैयाँ बजेट खर्च हुन नसकेको कार्यालयले जानकारी दिएको छ ।

मदनभण्डारी राजमार्गमा १७ करोड ३३ लाख रुपैयाँ बजेट विनियोजन भएकोमा १५ करोड ६४ लाख रुपैयाँ खर्च भएको छ भने १ करोड ६९ लाख रुपैयाँ खर्च हुन नसकेको कार्यालयले जनाएको छ । ९ करोड रुपैयाँ बजेट विनियोजन भएको सडक पूर्वाधार विकास कार्यक्रममा ३ करोड १४ लाख रुपैयाँ मात्रै खर्च भएको छ । यो शिर्षकमा ५ करोड ८५ लाख रुपैयाँ खर्च हुन सकेन ।

२४ करोड रुपैयाँ विनियोजन भएको तराई मधेस सडक पूर्वाधार विकास कार्यक्रममा ९ करोड ७७ लाख रुपैया मात्र खर्च भएको छ । यो शिर्षकमा विनियोजित मध्ये १४ करोड २२ लाख रुपैयाँ खर्च हुन सकेन ।

१० करोड रुपैयाँ विनियोजन भएको सडक क्षेत्र विकास आयोजनामा ३ करोड ३८ लाख रुपैयाँ मात्र खर्च भएको छ । यो शिर्षकमा विनियोजित ६ करोड ६१ लाख रुपैयाँ खर्च हुन सकेको छैन । ३४ करोड २२ लाख रुपैयाँ विनियोजन भएको स्थानीय सडक पुल निर्माण शिर्षकमा २९ करोड १८ लाख रुपैयाँ खर्च भएको छ भने ५ करोड रुपैयाँ खर्च हुन सकेको छैन ।

सरकारले चैत ११ गते लकडाउन शुरु भएको भन्दा पछि म्याद सकिएका सबै आयोजनाहरुलाई ६ महिना ठेक्का समय थप गरेको छ । चैत ११ भन्दा अघि सम्झौता समय सकिएको तर, काम पूरा नभएका हकमा भने कुनै निर्णय भएको छैन ।