दाङ, १३ माघ | चालु आर्थिक बर्ष २०७६÷०७७ मा दाङमा १३ स्थानमा पार्क निर्माण हुन लागेका छन् । पर्यटन क्षेत्रको बिकास गर्न पार्क निर्माण गर्न लागिएको डिभिजन बन कार्यालयले जनाएको छ । घोराहीमा ६ वटा, तुलसीपुरमा ४ वटा, दंगीशरण, बंगलाचुली र बबई गाउँपालिकामा एक÷एक पार्क निर्माण गर्न लागिएको सहायक बन अधिकृत संयोग बस्नेतले जानकारी दिनुभयो ।
उहाँका अनुसार घोराहीमा मल्टि बोटानिकल गार्डेन, बाह्रकुने दहमा बहुउद्देश्यीय पार्क निर्माण, शहीद स्मारक पार्क, धारापानी धार्मिक क्षेत्रमा पार्कसहित भौतिक पूर्बाधार निर्माण, घोदौरामा साँस्कृतिक डबली र लखन थापा पार्क निर्माण गरिने भएको छ ।
तुलसीपुरमा बोटानिकल गार्डेन, चमेरे गुफा तथा सुकेदह संरक्षण एवं सोन्दर्यकरण पार्क, छिल्लीकोटमा पर्यटकीय क्षेत्र संरक्षण र नबदुर्गा सामुदायिक बनमा आधुनिक ग्रीन पार्क निर्माण हुने भएका छन् ।
यस्तै बंगलाचुलीमा पार्क निर्माण, दंगीशरणमा कल्चरल पार्क तथा शालिक निर्माण, पुरन्धारा झरना गुरुयोजना निर्माण तथा पानी मुहान संरक्षण रहने बस्नेतले बताउनुभयो । तीमध्ये केही पार्क निर्माणको काम चलिरहेको र केही पार्क निर्माणका लागि सम्झौताको प्रक्रियामै रहेका उहाँको भनाई छ । पार्क निर्माणका लागि जिल्लामा ११ करोड रुपैयाँ बजेट छुट्याइएको छ ।
