रीता लामा
घोराही, २२ कात्तिक । नेपाल सरकारका उर्जा, जलस्रोत तथा सिंचाई मन्त्री बर्षमान पुन ‘अनन्त’ले चालु आर्थिक बर्ष मै दाङ सहित देशका ४१ जिल्ला विद्युतीकरण हुने बताउनुभएको छ । ‘तपाईहरु ढुक्क हुनुस हामीले यसैबर्ष दाङको सबै गाउँलाई विद्युतको सहज पँहुच भित्र राख्छौ । यसको लागि बजेट र योजना सबै तयारी अवस्थामा छन् ।’
उहाँले देशमा विद्युत उत्पादनको मात्रा बढीरहेको हुदाँ देशका अंधिकासं जिल्लाहरुका प्रत्येक गाउँबस्तीमा विद्युत पुर्याउने नेपाल सरकारले लक्ष्य पुरा हुन थालेको बताउनुभयो । ‘पहिलो चरणमा ४१ जिल्लाहरु पुर्ण रुपमा विद्युतीकरण हुन्छन् ।’ उहाँले भन्नुभयो ‘आगामी बर्ष अरु थप जिल्लाहरुलाई पुर्ण विद्युतिकरण गर्ने तयारी रहेको छ ।’ उहाँले विद्युतसँगै सौर्य, बायोग्यास लगायतका बैकल्पिक उर्जाको माध्यमबाट पनि देशलाई उज्यालो बनाउने अभियानमा लागेको बताउनुभयो ।
प्रेस संगठन दाङले आज घोराहीमा आयोजना गरेको पत्रकार भेटघाट कार्यक्रममा बोल्दै मन्त्री पुनले हालसम्म केही विद्युत भारतबाट आयात गरे पनि आगामी बर्ष देखि निर्यातको चरणमा पुग्ने बताउनुभयो । उहाँले देशले चालु आर्थिक बर्षमा पुरा गरेको साढे आठ प्रतिशत आर्थिक बृद्धिदर पनि विद्युतको सहज पँहुच कै कारण सम्भव भएको दावि गर्नुभयो ।
उहाँले आगामी बर्षसम्म देशले थप एक हजार मेघावट विद्युत मुख्य प्रसारण लाईनमा जोडिने हुदाँ कृषि, उर्जा, पर्यटन, होटेल व्यवसायमा लगानीको थप बाटो खुलेको जिकिर गर्नुभयो । नेपालले भारत, बंगलादेश र चिनसँग विद्युत वेच्ने सहमति गरेको हुदाँ आउदो १० बर्षमा १५ हजार मेघावट विद्युत उत्पादन गरेर यी तिनै देशलाई विद्युत विक्री गर्ने लक्ष्यका साथ सरकारले काम गरिरहेको जानकारी गराउनुभयो ।
सरकारले देशको भौतिक एवम मानविय विकासको लागि बाह्य र आन्तरिक लगानी बढाईरहेको हुदाँ समृद्ध नेपाल सुखी नेपालीको नारा छिट्टै पुरा हुने उहाँले आशा व्यक्त गर्नुभयो ।
प्रेस संगठन दाङका कार्यदल सदस्य प्रकाश चौधरीको अध्यक्षतामा कार्यक्रम सम्पन्न भएको थियो । कार्यदलका नेता जेएन सागरको स्वागत मन्तव्यबाट सुरु भएको कार्यक्रमको सहजिकरण कार्यदल सदस्य प्रेमबहादुर राम्जाले गरेका थिए ।