घोराही, १९ असार । रुख र जंगल जोगाउनको लागि संघिय संसदका सभामुख कृष्णबहादुर महाराले सबैलाई आग्रह गर्नुभएको छ । दाङको लमही नगरपालिकाले आयोजना गरेको विश्व वातावरण दिवसको अवसर पारेर बृहत वृक्षारोपण कार्यक्रमलाई सम्बोधन गर्दै सभामुख महराले सधै आफु हिड्ने बाटोमा बिरुवा रोप्न पाउँदा खुसि लागेको बताउनुभयो ।
पछिल्लो समय विभिन्न बाहानामा बन जङ्गल मास्ने पवृत्ति बढेकोप्रति चिन्ता व्यक्त गर्दै महराले बनजङ्गल जोगाउन सामुदायिक वनका उपभोक्ता नै स्वयम् सकृय हुनुपर्ने धारणा राख्नुभयो । सभामुख महराले संघिय सरकारमा नेपालको वातावरण परिवर्तन बारे बहस चलेको जानकारी दिदै प्राकृतिक सम्पदाको संरक्षणमा सवै व्यक्ति, तह र तप्कामा रहेकाहरु एकजुट हुनको लागि आग्रह समेत गर्नुभयो ।
‘हरियो वन, नेपालको पहिचान र सम्पत्ति हो ।’ सभामुख महराले भन्नुभयो ‘अव सबैको ध्यान बन जोगाउन तिर हुनुपर्छ । अनिमात्र नेपाललाई सधै हरियाली देख्न पाइन्छ ।’
सभामुख महराले लोपउन्मुख सतिसालको विरुवा रोपेर कार्यक्रमको उद्घाटन गर्नुभएको थियो । कार्यक्रममा त्यस्तै संघिय संसदका सांसद मेटमणी चौधरीले मुलुकलाई हरियालीको रुपमा विकास गर्न देशभर बृहत वृक्षारोपण कार्यक्रमको आवश्यक रहेको बताउनुभयो । उहाँले पनि मुलुकलाई बलियो र समृद्ध बनाउन देशलाई हरियाली एवम बनजंगलको संरक्षण आवश्यक रहेको औल्याउनुभयो |
कार्यक्रममा लमही नगरपालिका नगर प्रमुख कुलबहादुर केसीले दाङको लमही नगरपालिकालाई केन्द्रीय सरकार र प्रदेश सरकारको बजेटले छुन नसकेको गुनासो गर्नुभयो । उहाँले सभामुख महरालाई ध्यानाकर्षण गराउदै केन्द्र सरकारको बजेट आफ्नो क्षेत्रमा नपर्नु दुभाग्य भएको गुनासो गर्नुभयो ।
‘विभिन्न क्षेत्रमा लमहीको विकासको लागी हामीले डि.पि.आर तयार गर्यौ तर, लमही नगरपालिकालाई केन्द्रीय सरकार र प्रदेश सरकारको कुनैपनि बजेटले छोएन ।’ नगरप्रमुख केसीले भन्नुभयो । केसीले समानुपातिक ढंगले विकासे योजनाहरुमा बजेट ल्याउनमा भुमिका निर्वाह गर्न सभामुख महरालाई आग्रह गर्नुभयो ।
