दाङ, असार १६ । विसं. २०७५ सालको एसईई परिक्षामा जिल्लाबाट सबै भन्दा बढि जिपिए ल्याउने घोराहीकी भावना पोख्रेललाई गुरुकुल एकेडेमी घोराहीले सम्मान गरेको छ । विद्यालयमै एक कार्यक्रमको आयोजना गरेर भावनालाई सम्मान पत्रले सम्मान गरेको हो ।
नीजि तथा आवासीय विद्यालयहरुको छाता संगठन प्याब्सन दाङको उपाध्यक्ष निर्मल न्यौपाने, गुरुकुल एकेडेमीका प्रधानाध्यापक अभिनारायण निरौलाले भावनालाई सम्मान गर्नुभएको हो । कार्यक्रमका प्रमुख अतिथी प्याब्सन दाङका उपाध्यक्ष न्यौपानेले अध्ययन र अनुशासन दुई कुराले मात्रै विद्यार्थीहरुलाई सफल बनाउने बताउनुभयो ।
शिक्षाको साथै संस्कारले विद्यार्थीहरुको जीवनलाई सार्थक बनाउन सक्ने उहाँको भनाई छ । अहिले सरकारले नै नीजि र सरकारी विद्यालयहरुको विचमा विभेद गरेको समेत बताउनुभयो ।
कार्यक्रममा आफुनो अनुभव बाड्दै भावना पोख्रेलले जिल्लामा राम्रो अंक लिएर एसईई उत्तिर्ण गरेकोमा खुशी महसुस गरेको बताउनुभयो । आफूले दैनिक तालिका बनाएर अध्ययन गर्ने गरेको, स्वास्थ्यलाई बढि ख्याल गर्ने गरेको बताउनुभयो । स्वास्थ्य नै धन भएकाले स्वस्थ्य ब्यक्तिहरुले मात्रै राम्रो अध्ययन गर्न सक्ने भएकाले स्वास्थ्यलाई ख्याल गरेर अध्ययन गर्न विद्यार्थीहरुको अनुरोध समेत गर्नुभयो ।
गुरुकुल एकेडेमीका प्रधानाध्यापक अभिनारायण निरौलाको अध्यक्षतामा भएको कार्यक्रममा शिक्षक सतिश सुबेदीले स्वागत मन्तब्य गर्नुभएको थियो भने कार्यक्रमको सहजीकरण उपप्रधानध्यापक मुकुन्द गिरीले गर्नुभएको थियो । माउन्ट भ्यू बोडिङ स्कुलबाट एसईईमा ४ जिपिए ल्याउने पोख्रेलले काठमाण्डौमा अध्ययन गर्ने बताउनुभयो ।