नेपालगञ्ज, ११ साउन। आन्तरिक राजश्व कार्यालय नेपालगञ्जका १ जना अधिकृतमा कोरोना संक्रमण पुष्टि भएपछि सो कार्यालयलाई बन्द गरिएको छ ।
सो कार्यालयले आइतबार सार्वजनिक सूचना जारी गरेर सम्पूर्ण कर्मचारीको पीसीआर परीक्षण सुरु गरिएकोले उनीहरूको नतिजा नआउँदासम्म कार्यालय पूर्णरूपमा बन्द गरिएको जनाएको छ ।
आन्तरिक राजश्व कार्यालय नेपालगञ्जका प्रमुख प्रकाश पौडेलले कार्यालयका सम्पूर्ण कर्मचारी र उनका परिवारलाई होम क्वारेन्टाइन गरेर परिक्षण गराउन लागिएको जनाउँदै उनीहरू सबैको नतिजा नआएसम्मका लागि कार्यालयलाई बन्द गरिएको बताए ।
साउन ८ गते नगरको त्रिभुवन चोकमा गरिएको पीसीआर परीक्षणका क्रममा जुम्ला घर भएर नेपालगञ्जस्थित आन्तरिक राजश्व कार्यालयमा कार्यरत ती अधिकृतले परीक्षण गराउनु भएको थियो । शनिवार आएको परिक्षणको नतिजामा ती अधिकृतसहित अन्य तीन जनामा संक्रमण पुष्टि भएको थियो ।
संक्रमित रहेको पुष्टि भएपछि राजश्व कार्यालयका अधिकृतलाई शनिवार बेलुकानै नेपालगञ्जस्थित आइसोलेसन सेन्टरमा पठाईएको थियो ।
राजश्व कार्यालयका प्रमुख पौडेलले दैनिक सयौंको संख्यामा बाँके र बर्दियाबाट कर बुझाउन आउने सेवाग्राहीका कारण निकै भिडभाडमा काम गर्नु पर्ने बाध्यताले गर्दा अधिकृतलाई कोरोना संक्रमण भएको आशंका गरिएको बताए ।
ती अधिकृतले गत केही महिनादेखि कतै टाढाको भ्रमण गरेको नदेखिएपनि उनलाई असारको महिनामा बर्दियास्थित सेवा कार्यालयमा भने केही समयका लागि खटाईएको सो कार्यालयले जनाएको छ ।
