दाङ, २९ भदौ । नेपाल संस्कृत विश्वविद्यालयमा आंशिक प्राध्यापकले लगाएको ताला खुलेको छ । प्राध्यापकहरुले पेशागत माग राखी असार ३१ देखि बेलझुण्डीस्थित विश्वविद्यालयको केन्द्रीय कार्यालयमा अनिश्चितकालीन तालाबन्दी गरेका थिए ।
विश्वविद्यालयले गठन गरेको वार्ता समितिसँग तीन दिन गम्भीर छलफलपछि माग सम्बोधन गर्न अध्ययन समिति गठन गर्ने सहमति भएको छ । समितिले प्रस्तुत गरेको प्रतिवेदनका आधारमा आंशिक प्राध्यापकलाई करार प्रक्रिया अघि बढाउने सहमतिपछि ताला खोलेको नेपाल संस्कृत विश्वविद्यालय आंशिक प्राध्यापक संघर्ष समितिले जानकारी दिएको छ ।
समिति अध्यक्ष नवराज ढुंगाना र सचिव शेरबहादुर भाटले विज्ञप्ति जारी गरी ताला खोलेको जानकारी गरउनुभएको हो । विभिन्न विद्यार्थी संगठनले तीन महिनादेखि लगाएको ताला भने खुल्न बाँकी छ ।
विद्यार्थी संगठनहरुसँग वार्ता भैरहेको र अब एक साताभित्र सबै ताला खोल्ने गरी तयारी भइरहेको विश्वविद्यालयका तर्फबाट गठित वार्ता टोलीका संयोजक जनता विद्यापीठ बिजौरीका प्राचार्य योगराज शर्माले बताउनुभयो ।
तीन महिनासम्म ताला नखुलेपछि उपकुलपति प्रा. डा. भीमप्रसाद खतिवडाले बुधबार लिखितरुपमा सार्वजनिक आह्वान जारी गर्दै ताला खोल्ने वातावरण बनाउन सरोकारवाला निकायलाई आग्रह गर्नुभएको थियो।