सल्यान, १२ कार्तिक । सल्यानमा पराल बोकेको मिनी ट्रक दुर्घटना हुँदा तीन जनाको मृत्यु भएको छ । अरू ९ जना घाइते भएका छन् ।
दुर्घटनामा परी कपुरकोट-६ सिनबाङका १४ वर्षीय गोबर्द्धन खडका, १२ वर्षीय डिल्ली भन्ने अनिल भण्डारी र १३ वर्षको सिर्जना बस्नेतको मृत्यु भएको कपुरकोट गाउँपालिकाका अध्यक्ष दुर्गाबहादुर पुनले जानकारी दिनुभयो ।
दुई जनाको घटनास्थलमै र एक जनाको कपुरकोट अस्पतालमा उपचारको क्रममा निधन भएको हो । दुर्घटनामा अरु नौ जना घाइते भएका छन् ।
जिल्ला प्रहरी कार्यालयका सुचना अधिकारी प्रहरी निरीक्षक रेसम बहादुर खत्रीले कति जनाको मृत्यु भयो भन्ने तत्काल खुलाउन नसकिएको बताउनुभयो ।
उहाँका अनुसार दुर्घटनामा परेको मिनी ट्रक सडकदेखि १ सय ५० मिटर तल खसेको छ । साँघुरो बाटो भएकाले मिनी ट्रक दुर्घटनामा परेको देखिएपनि कसरी दुर्घटना भयो भन्ने नखुलेको उहाँको भनाइ छ ।
