दाङ : वैदेशिक रोजगारका नाममा २४ जनाबाट दुई करोड बढी ठगी

पीडितमध्येका एक नवराज बडुवाललाई ग्रीस पठाउने भन्दै सुनारद्वयले ३८ लाख रुपैयाँ ठगी गर्न भ्याए । त्यो पनि बैंक खाता प्रयोग गरेर । केहीपीडितबाहेक सबैले बैंक खाताकै माध्यमबाट उनीहरूलाई रकम दिएको देखिन्छ ।

अपराध अनुसन्धान कार्यालयमा भेटिएका पीडित मध्येकी सुष्मा तामाङका अनुसार ग्रीसमा लैजाने भन्दै उनीसँग १२ लाख रुपैयाँ लिएका थिए । तर, गत असारबाटै सम्पर्कविहीन भएका सुनारद्वयलाई पक्राउ गरी कारबाही गर्न तामाङसहित अन्य पीडितले वैदेशिक रोजगार विभागमा उजुरी हालेका थिए । विभागले गत वर्ष चैत १३ मै अनुसन्धान कार्यालयमा पत्र पठाउँदै सुनारद्वयलाई पक्राउ गरी सहयोग गर्न भनेको थियो ।

सुनारद्वयलाई पक्राउ गर्न पीडित नै प्रहरीसँग दिल्ली पुगेका थिए । काठमाडौं ल्याएपछि अनुसन्धान कार्यालयमा पीडितहरूको भीड लागेको थियो । ‘हामीलाई ठगी गरेको रकम चाहियो, पैसा दियो भने हामी मुद्दामा जाँदैनौं नत्र मुद्दामा जान्छौं,’ पीडित मध्येकी एक महिलाले भनिन्, ‘यिनीहरूको सम्पत्ति रोक्का गरेर भएका जायजेथा बेचेर भए पनि हाम्रो पैसा फिर्ता दिलाउनुपर्छ ।’

लामो प्रयासपछि प्रहरी उनीहरूलाई पक्राउ गर्न सफल भएको हो । ‘सुनारद्वयले पश्चिममा नेपालगन्ज, दाङ, कञ्चनपुर, पूर्वमा झापा, मोरङ, सुनसरीसँगै उपत्यकाका तीनवटै जिल्लाका व्यक्तिलाई ठगी गरेको देखियो,’ अनुसन्धानमा संलग्न एक प्रहरी अधिकृतले भने, ‘लामो प्रयासपछि दिल्लीबाट ल्याउन सफल भयौं ।’

अनुसन्धान कार्यालयले सुनारद्वयलाई विभागमा बुझाएको छ । कार्यालयका प्रमुख एसएसपी सानुराम भट्टराईका अनुसार वैदेशिक रोजगारीको प्रलोभन देखाएर यी दुई जनाले दुई करोड बढी ठगी गरेको देखिन्छ । ‘पीडितबाट रकम संकलन गरेर सम्पर्कविहीन भएपछि उजुरी विभागमा परेको थियो, पक्राउ गरेर सहयोग गरिदिन अनुरोध गरेपछि पक्राउगरी बुझाइदिएका हौं,’ भट्टराईले भने, ‘ सुनारद्वय विगत १० महिनादेखि भारतको दिल्लीमा लुकेर बसेको देखियो ।’

वैदेशिक रोजगार विभागका प्रवक्ता गुरुदत्त जोशीले सुनारद्वलाई प्रहरीले बुझाएको र पीडितले दिएको जाहेरीअनुसार मुद्दा दर्ता हुने बताए । उनले भने, ‘पीडितले दिएको जाहेरीअनुसार मुद्दा दर्ता हुन्छ ।’