तुलसीपुर, २ भदौ | चाडपर्वलाई लक्षित गरेर तुलसीपुर उपमहानगरपालिकाले सस्तो पसल सञ्चालन गर्ने भएको छ । सहकारीसँग समन्वय गरेर बजार प्रवेश गर्ने चारैवटा नाकामा सस्तो पसल सञ्चालन गरिने नगरउपप्रमुख माया शर्माले जानकारी दिइन् । सस्तो पसल खाद्य सामाग्रिसंग सम्बन्धित रहने उनको भनाई छ । ‘चामल, चिनि, मैदा, नुन, तेल लगायतका दैनिक उपभोग्य खाद्य सामाग्रि बिक्रिवितरण गर्ने गरी सस्तो पसल संचालन गर्नेछौँ’ उनले भनिन् –‘सस्तो पसलले विपन्न तथा न्युन आए भएका व्यक्तिलाई सहयोग पुग्ने छ ।’
बजार व्यवस्थापन तथा अनुगमन समितिकी संयोजक समेत रहेकी शर्माले चाडपर्वमा बजारमा भिडभाड पनि निकै हुने हुँदा उपभोक्ता ठगिन सक्ने भएकालले पनि सस्तो पसल प्रभावकारी हुने बताएकी छन् । चाडपर्वमा सहुलियत पसल संचालन भएपछि ग्रामिण भेगका नागरिकलाई झनै सहज हुने छ उनले भनिन्–‘ उपभोक्ताको मागलाई मध्यनजर गर्दै सस्तोपसल संचालन गर्न लागिएको हो ।’
यसैबीच चाडपर्वमा व्यापारीले मनलाग्दो किसिमले मूल्यवृद्धि गर्ने प्रवृत्ति मौलाएको भन्दै त्यसको अन्त्यका लागि तुलसीपुर उपमहानगरपालिकाले कार्ययोजना अगाडि बढाएको छ । वजार अनुगमन तथा व्यवस्थापन समितिकी संयोजक आचार्यले बजार अनुगमन गरेर आवश्यक कारवाही अगाडि बढाइने बताइन् । उनले चाडपर्व भनेर मनलाग्दो तरिकाले मुल्य वढाउने क्रमको अन्त्य गर्नका लागि स्थानीय सरकारले ध्यान दिने कुरामा जोड दिइन् ।
उपभोक्ता अनुगमन तथा व्यवस्थापन समितिको तुलसीपुरमा वसेको बैठकले बजारमा उपभोक्ता नठगिउन् भन्नका लागि मुल्य सूचि टाँस अनिवार्य गर्नुपर्ने निर्णय गरेको छ । ‘बजार मूल्य टाँस गर्नु कानुनी कुरा पनि हो, यो वारेमा उद्योग वाणिज्य संघसँग सल्लाह गरेर प्रक्रिया अगाडि बढाइनेछ ’ संयोजक आचार्यले भनिन् । उनले कतिपय वस्तुको मुल्य विक्रेताले आफुखुसी वढाउने गरेको बताउँदै विना कारण उपभोक्ताको ढाड सेक्ने गरी मुल्य वृद्धि गर्न नहुने बताइन् ।
तुलसीपुर उद्योग वाणिज्य संघका उपाध्यक्ष मिनराज भण्डारीले बजार अनुगमनका लागि उद्योग वाणिज्य संघले सहयोग गर्ने वताए । उनले एकाध व्यापारीले गलत गर्दा सबै व्यापारीको नाम मुछिएको कुरामा समेत जोड दिए । ‘कसैले पनि आफ्नो मन लाग्दो गर्छ भने त्यो सह्य हुँदैन ’ भण्डारीले भने । उनले उद्योग वाणिज्य संघले वजार शुद्धिकरणका लागि सहयोगी भुमिका खेल्ने कुरामा जोड दिए ।
जिल्ला वचत तथा ऋण सहकारीका अध्यक्ष रुपवहादुर खत्रीले वजारमा कालोवजारीका साथै मिसावट पनि वढेको बताउँदै स्थानीय सरकारले प्रशासनको सहयोगमा त्यसलाई नियन्त्रण गर्नुपर्ने वताए । उनले वजारमा के भइरहेको छ भन्ने वारेमा स्थानीय सरकार अनभिज्ञ रहेको आरोप समेत लगाए । ‘जनताको गुनासो आएपछि मात्रै होइन की वेला वेलामा वजारमा के भइरहेको छ भन्ने वारेमा पनि चासो दिनु आवश्यक छ ’ उनको भनाई छ ।
उपभोक्ता हित संरक्षण मञ्चका केन्द्रीय सदस्य केशव कुमार शर्मा वजारसँगै यातायात लगायत अन्य कुराहरुमा पनि निरन्तर अनुगमनको खाँचो पर्ने वताए । उनले वजारमुल्य अनिवार्य रुपमा सबैले टाँस्नुपर्ने कुरामा जोड दिदै सामानको गुणस्तर समेत जाँच गर्नुपर्ने आवश्यकता रहेको कुरामा जोड दिए । ‘वजारमा अहिले विषादी मिसाएका कुराहरु समेत आइरहेका छन् तर त्यसका वारेमा कसैलाई पनि चासो छैन’ शर्माको भनाइ रहेको छ । उनले मानिसको स्वास्थ्यमा असर पार्ने तरकारी, फलफुल र मिठाईको शुद्धता जाँच्नुपर्ने आवश्यकता रहेको कुरामा जोड दिए ।
