दाङ, ५ कार्तिक । नेपाली बजारमा सुनको मूल्यले दैनिक नयाँ रेकर्ड बनाउँदै आएको छ । नेपाल सुनचाँदी व्यवसायी महासंघका अनुसार असोज २३ गतेयता सुनको मूल्य दैनिक बढ्दै गएको छ । आज छापावाल सुनको मूल्य प्रतितोला ६०० रुपैयाँ बढेर एक लाख ६५ हजार ६०० रुपैयाँमा कारोबार भइरहेको छ । यो हालसम्मकै उच्च मूल्य हो । यसअघि, आइतबार एक लाख ६५ हजार रुपैयाँमा उच्च मूल्यमा कारोबार भएको थियो ।
असोज २३ गते एक लाख ५९ हजार १०० रुपैयाँबाट छापावाल सुनको मूल्य बढ्नेक्रम रोकिएको छैन । त्यसपछिका कारोबार दिनमा सुनको मूल्य लगातार बढ्दै गएको छ ।
त्यसपछि दसैँलगत्तै बजार खुल्दा असोज २९ गते एक लाख ६० हजार ५०० रुपैयाँमा कारोबार भएको थियो । असोज ३० गते एक लाख ६१ हजार ८०० रुपैयाँमा कारोबार भएको छापावाल सुन कात्तिक १ गते एक लाख ६२ हजार ४०० मा कारोबार भयो । २ गते एक लाख ६४ हजार ४०० र कात्तिक ४ गते एक लाख ६५ हजार रुपैयाँमा कारोबार भएर नयाँ रेकर्ड बनाएको थियो ।
आज चाँदीको मूल्य पनि २० रुपैयाँ बढेको छ । यसदिन चाँदी प्रतितोला दुई हजार ९५ रुपैयाँमा कारोबार भइरहेको महासंघले जनाएको छ । आइतबार चाँदी प्रतितोला दुई हजार ७५ रुपैयाँमा कारोबार भएको थियो ।