दाङको भालुवाङमा १३ महिनामा सवारी दुर्घटनामा परी २१ जनाको मृत्यु

ओम प्रकाश गुप्ता

देउखुरी, ५ भदौ । दाङ-देउखुरीको भालुवाङमा मात्रै १३ महिनामा सवारी दुर्घटनामा परी २१ जनाको ज्यान गएको छ । गएको साउन १५ गते भालुवाङमा ट्रकको ठक्करबाट सोही ठाउँ निवासी बर्ष ५० का फलफूल ब्यापारी लोकप्रसाद भट्टराईको घटनास्थल ज्यान गयो । भट्टराईले जेब्रा प्रयोग नगरेर सडक पार नगर्दा ट्रकको ठक्करबाट ज्यान गएको प्रहरीले जनाएको छ। यस्तै गएको गत असार २२ गते मिनिट्रकको ठक्करबाट कालाकाटे निवासी बर्ष ४४ का सन्तोषकुमार योगीको पनि घटनास्थल मै ज्यान गयो ।

उहाँलाई बिपरित दिशाबाट आएको मिनीट्रकले ठक्कर दिएको थियो । त्यस्तै गत पुस २७ गते भालुवाङको राप्ती पुलबाट यात्रु बोकेको बस खस्दा करिब १२ जनाको पनि घटनास्थल मै ज्यान गयो । यी त उदाहरण मात्रै हुन् । यस्ता अन्य सवारी दुर्घटना धेरै भएको प्रहरीले जनाएको छ । त्यहाँ भएका सबै दुर्घटनामा ट्राफिक नियम पालना नगरे कै कारण दुर्घटना भएको प्रहरीको अनुसन्धानले देखाएको छ ।

बितेको एक बर्षमा भालुवाङमा मात्रै सवारी दुर्घटनामा परी १८ जनाले ज्यान गुमाएका छन् भने २३ जना घाइते भएको प्रहरीले जनाएको छ । यस्तै देउखुरी क्षेत्रमा मात्रै सवारी दुर्घटनामा परी ६० जना बढीको मृत्यु भएको इलाका प्रहरी कार्यालय भालुवाङले जनाएको छ । जसमध्ये भालुवाङ बजार क्षेत्रमा सबै भन्दा बढी दुर्घटना हुने गरेको छ ।