दाङ, ८ कार्तिक । सुर्खेतको बराहतालमा गाडी दुर्घटना हुँदा एक जनाको मृत्यु भएको छ। बिहीबार बिहान जुम्लाबाट सुर्खेततर्फ आइरहेको गाडी नम्बर कर्णाली प्रदेश ०२००१ ख १०१४ गाडी बराहताल गाउँपालिका–८ हुड्केमा दुर्घटनामा परेको हो।
दुर्घटनामा दैलेखको ठाँटीकाँध गाउँपालिका–४ का ३५ वर्षीय दीपक शाहीको मृत्यु भएको हो। गम्भीर घाइते उनलाई उपचारको लागि प्रदेश अस्पताल सुर्खेत पुर्याइएको थियो। चिकित्सकले लगत्तै मृत घोषणा गरेका थिए। दुर्घटनामा अरु पाँच जना घाइते भएको जिल्ला प्रहरी कार्यालय सुर्खेतले जनाएको छ।
घाइते सबैको अवस्था सामान्य रहेको छ। घाइतेहरूको कर्णाली केयर अस्पतालमा उपचार भइरहेको छ। गाडीमा बच्चासहित २९ जना सवार थिए। तीव्र गतिमा रहेको गाडी अनियन्त्रित भएर सडक छेउमा पल्टिएको अनुमान प्रहरीको छ।
