दाङ, १९ असोज । दाङको घोराहीदेखि रोल्पाको होलेरी हुँदै थबाङ जोड्ने सहिद मार्ग सडक मर्मत गर्न सुरु गरिएको छ । चाडपर्वको समयमा सडकमा भएका खाल्टाखुल्टी पर्न सरकारले निर्देशन दिएपछि बर्सातमा सडकमा भएका खाल्टाखुल्टी पुर्नेदेखि नाला सफा गर्ने काम सुरु भएको हो ।
सहिद मार्ग अन्तर्गत पहिलो चरणमा घोराही उपमहानगरपालिका-१३ सेवारखोलादेखि होलेरी सडकखण्डमा मर्मतको काम भइरहेको सहिद मार्ग आयोजना रोल्पाका सूचना अधिकारी इन्जिनियर सुमन सुवेदीले जानकारी दिएका छन् । बर्सातको समयमा पहिरोसँगै सिमेन्ट उद्योगका लागि चुनढुङ्गा बोक्ने टिप्परका कारण बिग्रिएको सडक मर्मत गर्ने काम भइरहेको बताए ।
सडकमा भएका खाल्टाखुल्टी पुर्ने, सडकमा खसेको पहिरो हटाउने, सडक सम्याउने, अत्यावश्यक ठाउँमा वाल उठाउनेदेखि नाला सफा गर्नेलगायतका काम भइरहेको सूचना अधिकारी सुवेदीले बताए ।
‘चाडपर्व अघि नै सडकलाई राम्रो बनाउने गरी सहिद मार्ग अन्तर्गत घोराही-होलेरी सडकखण्डमा भएका खाल्टाखुल्टी पुर्नेदेखि पहिरो हटाउने काम भइरहेको छ’, सूचना अधिकारी सुवेदीले भने, ‘पहिलो खण्डमा घोराही-होलेरी सडकखण्ड मर्मत गरिसकेपछि होलेरी-थवाङ सडकखण्ड मर्मत गर्ने छौँ ।’
खास गरी सिमेन्ट उद्योगका टिप्पर चल्ने भएका कारण घोराही-होलेरी सडकखण्डको डुम्मरगाउँदेखि खुमबाससम्म धेरै बिग्रिएकाले हुलाकी सडक आयोजना र सिमेन्ट उद्योगले संयुक्त रूपमा सडक मर्मत गरिरहेको बताए ।
उनका अनुसार दसैं अघि नै सडक पूणर्रुपमा सुरक्षित बनाउने गरी मर्मतको काम भइरहेको छ । सडकमा परेका खाल्टाखुल्टी पुर्नेदेखि पहिरो हटाउनका लागि दुईवटा पानी ट्याङकर, चारवटा टिप्पर र जेसिबी सिमेन्ट उद्योगले उपलब्ध गराएको छ भने स्काभेटर, ग्रेडर मेसिन, लोडर, नाला सफा गर्दा आवश्यक पर्ने जनशक्ति सडक मार्ग आयोजनाले उपलब्ध गराएको सूचना अधिकारी सुवेदीले बताए । विशेष परिस्थिति बाहेक प्रत्येक ४/४ महिनाको अन्तरालमा सडक मर्मत संभार गर्ने सहमति भएको थियो ।
जिल्ला प्रशासन कार्यालय दाङमा आयोजना प्रमुख, स्थानीय तह प्रमुखसँगै सिमेन्ट उद्योगका प्रतिनिधिबिच भएको सहमति अनुसार सम्राट सिमेन्ट र सोना सिमेन्ट प्रालिले आवाश्यक उपकरण सहयोग गर्नुका साथै मर्मत गरिसकेपछि घोराही उपमहानगरपालिका, रोल्पाको रुन्टीगडी गाउँपलिका, सहिद मार्ग सडक आयोजनासँगै सिमेन्ट उद्योगका प्रतिनिधिले संयुक्त रूपमा अनुगमन गर्ने सहमति भएको थियो । उक्त सडकखण्डमा सम्राट सिमेन्ट र सोना सिमेन्टका चुनढुङ्गा बोक्ने करिब एक सय ५० बढी टिप्परहरू चल्ने गर्दछन् ।