दाङ, ९ असोज । तुलसीपुर उपमहानगरपालिकामा निमित्त प्रमुख प्रशासकिय अधिकृत जिम्मेवारीलाई मजाक बनाइएको छ । आइतबार प्रमुख प्रशासकिय अधिकृत गेहेन्द्र बहादुर डाँगीले आफु काठ्माण्डौ जाने भन्दै निमित्तको जिम्मेवारी प्रशासन शाखा प्रमुख बिष्णु कुमारी आचार्यलाई दिनुभएको थियो । तर निमित्त प्रमुख प्रशासकिय अधिकृतको जिम्मेवारी पाउनुभएकी आचार्य नै सोमबार कार्यालय समयमा नभएपछि सेवाग्राहीले सास्ती पाएका थिए ।
त्यसदिन उहाँले कार्यालय समयमा नै हाजिरी लगाएर श्राद्ध कार्यमा सहभागी आफैले स्विकार गर्नुभयो । उहाँले आफन्तकोमा जानुअघि लेखा शाखा प्रमुख खिमलाल वलीलाई मौखिक जिम्मेवारी दिनुभएको थियो ।
तर अधिकृत वली पनि कोष तथा लेखा नियन्त्रक कार्यालयमा जानुपर्ने भएपछि त्यसपछिको मौखिक जिम्मेवारी शिक्षा महाशाखा प्रमुख चक्र बहादुर भण्डारीले पाउनुभएको थियो ।
अनि फेरि भण्डारी पनि जिन्सि निरिक्षणमा गएपछि मौखिक जिम्मेवारी स्वास्थ्य महाशाखा प्रमुख ओम पि न्यौपानेलाई दिइएको थियो । सोमबार निमित्त प्रमुख प्रशासकिय अधिकृतको जिम्मेवारी एकैदिन चार जनाले पाएको एक कर्मचारीले बताए ।
स्थानीय सरकार संचालन ऐन २०७४ को दफा ८४ को उपदफा ५ मा प्रमुख प्रशासकिय अधिकृतले आफुलाई प्राप्त अधिकारमध्ये आवश्यकता अनुसार केहि अधिकार आफु मातहतको कर्मचारीलाई प्रत्यायोजन गर्न सक्ने व्यवस्था छ ।
ऐन अनुसार निमित्त प्रमुख प्रशासकिय अधिकृतको जिम्मेवारी पाएकी आचार्यले अरुलाई निमित्तको जिम्मेवारी दिन मिल्दैन । तर उहाँले जिम्मेवारी पाएको दिन नै अरुलाई मौखिक रुपमा जिम्मेवारी दिएपछि निमित्तको जिम्मेवारी नै मजाक बनेको छ ।
प्रमुख प्रशासकिय अधिकृत डाँगीले आइतबार आफु नआउनन्जेलसम्मका लागि सोमबारदेखि आचार्यलाई निमित्तको जिम्मेवारी दिनुभएको छ । पत्र अनुसार प्रमुख प्रशासकिय अधिकृत डाँगी कहिले काममा फर्किने भन्नेबारे टुंगो छैन् ।
