दाङ, २३ भदौ । लुम्बिनी प्रदेश सभा सदस्य धनबहादुर केसी ‘डीबी’ कारागार चलान भएका छन् । फौजदारी मुद्दामा नेपाल प्रहरीको फरार सूचीमा रहेका सांसद केसीले रुकुम जिल्ला अदालतमा पुगेर आत्मसमर्पण गरेका हुन् । उनले आत्मसर्मपण गरेलगत्तै अदालतले तोकिएको सजाय भुक्तान गर्न कारागार पठाएको जिल्ला प्रहरी कार्यालय रुकुम पूर्वले जानकारी दियो ।
सरकारी कागजपत्र किर्ते गरेको अभियोगमा केसीलाई अदालतले एक वर्ष कैद र दुई हजार जरिवाना हुने फैसला सुनाएको थियो । तर बहुदल परिवर्तनलगत्तै २०४८ मा भएको फैसला अहिलेसम्म कार्यान्वयन नभएपछि केसीले निर्वाचनमार्फत प्रदेशसभाको यात्रा पनि गर्न भ्याए । केसीविरुद्ध उनकै श्रीमती राधा केसीले मुद्धा दायर गरेकी थिइन् ।
सम्बन्ध विच्छेदका लागि नक्कली कागजपत्र बनाएको भन्दै दायर गरेको मुद्दामा उनी अदालतबाट दोषी ठहर भएका थिए तर, सत्ताको संरणमा पक्राउ परेका थिएनन् । हालै उनले मुख्यमन्त्री चेतनारायण आचार्यलाई विश्वासको मत दिएको खबरहरु पनि बाहिरिएका थिए ।
