दाङ, ७ असोज । घोराही उपमहानगरपालिका १६ सर्रास्थित ज्ञानमाला एकेडेमीमा एकदिने ट्राफिक सचेतना कार्यक्रम आइतबार सम्पन्न भएको छ । विद्यालयमा गठित नेपाल जुनियर रेडक्रस सर्कलको आयोजनामा उक्त सचेतना कार्यक्रम सम्पन्न भएको हो ।
नेपाल जुनियर रेडक्रस सर्कल ज्ञानमालाका अध्यक्ष शिद्धान्त भट्टराईको अध्यक्षतामा आयोजित उक्त कार्यक्रममा ट्राफिक नियम, संकेत, सडक सुरक्षा तथा सावधानी, दण्ड सजायलगायतका बिषयमा विद्यार्थीलाई जानकारी गराइएको थियो ।
कार्यक्रमका प्रमुख अतिथि जिल्ला ट्राफिक प्रहरी कार्यालय घोराहीका प्रमुख प्रहरी निरिक्षक राजेश शाहीले ट्राफिक नियमको इमान्दारीतापुर्वक सबैले पालना गर्नसके सडक दुर्घटना न्युनिकरण हुने बताउनुभयो । हरेक नागरिक आ–आफ्नो स्थानबाट जिम्मेवार बन्न जरुरी रहेको उहाँले उल्लेख गर्नुभयो ।
कार्यक्रमका प्रमुख प्रशिक्षक समेत रहनुभएका शाहीले आम जनताबाट प्रहरीलाई नैतिक सहयोग आवश्यक रहेको बताउनु भयो । जनताकै सुरक्षाका लागि सवारी चेकजाँच गर्नुपरेको प्रशिक्षक शाहीले उल्लेख गर्नुभयो । नियमविपरित सवारी चलाउँने चालकहरुलाई नियम बमोजिम नै दण्डजरिवाना गरिएको उल्लेख गर्दै शाहीले नियमपालना र सडक सुरक्षा अबलम्वनका लागि परामर्श दिने गरेको समेत बताउनुभयो ।
प्रशिक्षणका क्रममा निरिक्षक शाहीले सडकमा यात्रा गर्दा होस् या सवारी साधन चढ्दा वा चलाउँदा सतर्कता अपनाउन आफ्ना अभिभावकहरुलाई समेत सचेत गराउँन विद्यार्थीहरुलाई आग्रह गराउनुभयो । सानो लापरबाहीले अकालमा ज्यान गुमाउनु पर्दा सन्तानमा विचल्ली, परिवार र आफन्तहरुमा समेत पिडा थपिने भएकाले सचेत रहन निरिक्षक शाहीले विद्यार्थीहरुलाई आग्रह गर्नुभयो ।
जुनियर रेडक्रस सर्कलकी उपाध्यक्ष बेबिका श्रेष्ठको स्वागत मन्तव्यबाट सुरु भएको कार्यक्रम सिर्जनशील बाल क्लवकी अध्यक्ष स्मारिका चौधरीले शुभकामना मन्तव्य राख्नुभएको थियो । कार्यक्रममा कक्षा ८, ९ र १० को सहभागिता रहेको थियो । उक्त कार्यक्रमको सहजिकरण सर्कलका सचिव प्रनित रिजालले गर्नुभएको थियो ।