लमही, ८ भदौ । लमही नगरपालिकाभित्र संकलन हुने फोहोरलाई कसरी व्यवस्थापन गर्ने भन्ने बारे छलफल भएको छ । दिगो विकास लक्ष्य स्वैच्छिक पुनरावलोकन प्रतिवेदन निर्माणको काम गर्दै आएको युएनडिपिका प्रतिनिधिसंग पालिकाले फोहोर व्यवस्थापन सम्बन्धि छलफल गरेको हो ।
छलफलमा फोहरलाई मोहरमा परिणत गर्नका लागि कसरी काम गर्न सकिन्छ भन्ने विषयमा छलफल भएको लमही नगरपालिका नगर प्रमुख जोगराज चौधरीले जानकारी दिएका छन् । उनले फोहोरलाई मोहरमा परिणत गर्न सके सबैलाई फाइदा पुग्ने बताउदै फोहोर बस्तुबाट प्राङ्कारिक मल उत्पादन गर्न सकिने, ग्यास उत्पादन गर्न सकिने भन्दै नगरपालिकाले यसतर्फ ध्यान दिएको बताए ।
‘कुनै पनि काम गर्दा योजना पूर्व तयारी आवश्यक हुन्छ, एक पटक काम गरेपछि फेरि त्यो कामलाई बिगारेर गर्नु पर्ने परिपाटी बसेको छ यसले गर्दा हाम्रो वजेट र समय खेर गैरहेको हुन्छ’,नगर प्रमुख चौधरीले भने,‘यो कुरामा सबैको ध्यान जान जरुरी छु ।’ लमही नगरपालिका उपप्रमुख लक्ष्मी योगीले समृद्ध नगरपालिका बनाउनका लागि सबै शाखाका कर्मचारीहरुको महत्त्वपूर्ण भुमिका रहने बताईन ।
किसानलाई समयमा मल पुर्याउन नसकेको भन्दै फोहोरलाई मलमा परिणत गरेर किसनलाई मल बितरण गर्न सकिने कुरामा जोड दिइन । नगरपालिका सफल भएमा सबैको नाम जोडिने भन्दै नगरपालिकाको विकासको लागि तनमन लगाएर अगाडी बढ्न कर्मचारीहरुलाई आग्रह गरिन ।
लमही नगरपालिकाका प्रमुख जोगराज चौधरी, उपप्रमुख लक्ष्मी योगी, प्रमुख प्रशासकीय अधिकृत देवेन्द्र प्रसाद श्रेष्ठ, युएनडिपी लुम्बिनी प्रदेश प्रमुख सुदीप अर्याल, विपत व्यवस्थापन शाखा प्रमुख गायत्री थापालगायतको सहभागीतामा फोहोर व्यवस्थापनका बारेमा छलफल भएको थियो ।
प्रतिवेदन पुस्तक हस्तान्तरण
त्यस्तै युएनडिपिको प्राविधिक सहयोगमा तयार पारिएको दिगो विकास लक्ष्य स्वैच्छिक पुनरावलोकन प्रतिवेदन सार्वजनिक भएको छ । उक्त पुस्तक लमही नगरपालिकालाई हस्तान्तरण गरिएको छ ।
आगामी सन २०३० सम्म यो लक्ष्य प्राप्ती गर्नका लागि पुस्तक मार्ग दर्शक बन्ने कुरामा विश्वास व्यक्त गरिएको छ । नगरप्रमुख जोगराज चौधरीको अध्यक्षतामा भएको कार्यक्रमको सहजीकरण प्रशासन शाखा प्रमुख महेश थापा ठेंडीले गरेका थिए ।