मुम्बई–कोरोनाको दोस्रो लहरले भारत पुनः लकडाउनको अवस्थामा पुगेको छ । कोरोना महामारीको इपीसेन्टर बनेको महाराष्ट्रमा कोरोना सम्बन्धी अत्यावश्यक मार्गनिर्देशिकासँगै मिनी लकडाउन गरिएको छ ।
बलिउड हंगामामा प्रकाशित समाचारअनुसार स्थानीय सरकारको यो निर्णयले मनोरञ्जन जगतको गतिमा ब्रेक लागेको छ । यहाँ थिएटरलाई पहिले नै बन्द गर्न निर्देशन दिइएको थियो । अब फिल्म र टेलिभिजन शोको सुटिङमा पनि कैयौं किसिमको रोक लगाइएको छ ।
यो निर्णयले ठूला बजेटका फिल्मको काम पनि आधामै रोकिएको छ । जसमा शाहरुख खानको ‘पठान’, प्रभासको ‘आदिपुरुष’ र ‘सलमान खानको ‘टाइगर ३’ छन् ।
यी तिन कलाकारको फिल्मको मुम्बईस्थित फिल्म सिटी स्टुडियोमा सुटिङ भइरहेको थियो ।
महाराष्ट्रमा धारा १४४ लगाइएको छ । जस अनुसार अत्यावश्यक कामबाहेक सबै कुरामा प्रतिबन्ध लगाइएको छ । ‘पठान’, ‘आदिपुरुष’ र ‘टाइगर ३’ को सुटिङ १५ दिनका लागि रोकिएको छ ।
शाहरुखको ‘पठान’को केही सेड्युलको सुटिङ पुरा भइसकेको छ । सलमानको ‘टाइगर ३’ गत महिनाबाट छायांकन सुरु गरिएको छ । त्यस्तै प्रभासको ‘आदिपुरुष’को सुटिङ सुरुवाती अवस्थामा नै थियो ।